انااااااااااااااااا

من فتره كده نور صاحبتي الي هيا نهير كانت بعتتلي تاج عباره عن خمس حجات عني انا فضلت افكر اقول ايه بالظبط وابعت ولما مش ابعت وبعدين هتكلم عن نفسي ااقول ايه يعني
المهم اخيرا قررت اكتب
ومعلش بقى يانونو على التأخير

( 1)

كان نفسي فأمنيتين اعملهم فحياتي بس متحققوش
اول واحده بس من غير ضحك بقى كان نفسي اطلع ممثله انا مثلت فالمدرسه ايام الثانوي مسرحيات وكنت باخد ادوار بطوله ومره عملت سندريلا بس بالفرنش ولما دخلت الجامعه بردو اشتركت فمسرحيه
كان نفسي اوي اكمل فالموضوع ده وكنت حاباه كمان بس للآسف ساعات الحياه بتخلينا نتخلى عن حجات غصب عننا
تاني امنيه بقى كان نفسي ادخل كليه هندسه لدرجه اني فكرت وانا فالجامعه اني ارجع اعمل ثانوي عام تاني بس حسيت انها مخاطره شويه خصوصا وانا مش بتاعت مذاكره خالص
انا عارفه انهم امنيتن متناقضين شويه بس لو كانت واحده فيهم اتحققت كنت هكون سعيده
في امنيه تلته دي حاسا بقى اني هحققها وهيا اني اركب خيل

(2)

مسرفه شويه ..........لابصراحه قوي : بجد بجد بحاول ابطل العاده دي وكل شهر ااقول المره دي المصروف هيكمل معايا لآخر الشهر لكن تقول لمين ميعديش اسبوع ولا اتنين وافضل اسلتف من ماما
المشكله اني بجد معرفش انا بصرف الفلوس فأيه وابص الاقيها خلصت مني
ساعات بلاقي نفسي شاريه حجات بردو ومش بستعملها وساعات الاقي حجات فدرج المكتب والدولاب بقالها اسبوع شارياها ونسياها اصلا
لما باجي اخرج كل مره يتكرر نفس الموقف اخد الفلوس ااقول لآ انا مش هاخد الفلوس كلها هاخد على الاقد بس واول لما اخرج من باب الاوضه الاقيني تلقائيا رجعت تاني واخدت فلوس زياده
وااقول لنفسي يمكن يحصل حاجه
ومش بيحصل حاجه غير اني بفرتكهم

( 3)

بتفائل اوي فاليوم الي اصحا فيه الصبح واول حاجه اسمعها لما افتح عيوني تكون صوت العصافير بلاقيني ابتسمت كده واحس جوايا انه في حاجه حلوه فاليوم ده هتحصل


(4)

بيجيلي اوقات بحب قوي اتمشى لوحدي والاقيني انزل وافضل امشي فالشارع ومش عارفه انا رايحه فين بالظبط ساعات الاقيني عيوني دمعت غصب عني
افضل افكر فحجات كتيره فحياتي وساعات مش بفكر الاقيني ماشيه كده وخلاص ببص بس على الناس والاماكن


(5)

ساعات بحس اني انسانه بطبعي حزينه شويه معرفش ليه وممكن لو بسمع لحن حزين شويه خصوصا من عمر خيرت الاقيني سرحت معاه و عيطتت بردو مش عارفه ليه يمكن لآنه حصلت حجات فحياتي مأثره عليا بطريقه انا مش شايفاها مع اني بضحك وكتير لكن ساعات كتيره بكون بضحك ومن جوايا وجع كبير ويمكن كمان ساعات بحس اني بضحك قوي عشان اعمل نفسي مش واخده بالي
لكن الاوقات الي بضحك فيها فعلا بصدق من جوايا بتكون قليله قوي